AADHAR CARD (UID) KHU SETAN NAMBAT 666 ADIEI?

Pastor Dr. M. Thangboi Zou*                                          

*Thumapui*: Amasan anai leh gamla pan tam Local Newspaper simtu zousie kasepna munpan chibai ka hing bawl hi. Tunia igam sunga Gingtute buoina khat a kamu ahileh Aadhar Card leh Setan number 666 kibang chi thu ahia, akibatloudan itheisiem na diing un laibu tuomtuom leh internet tungtawn in mawltain hilchien lei chin ka hing kaikhawm a, bukimlouna gam a khosa ihiman in genkhiel leh gelval zousie simtuten na hing theisiem diing un kang ngan masa hi. I thupi pansan in Aadhar Card, Microchip, Setan Nambat leh akizat hunte anuoi a ikikum khawm diing uhi.

1.      *AADHAR CARD (UID) KISIEM DAN*:

Tam UID kisiem nasan ahileh, “India mi hiloute kithei khiet na diing” chi ahi. Tami na kila nuomlou leh, India mi hihna na nei sih diing hi. *Gentenna* Manipur a Bill 3 in, Singtang mite Manipur mi hilou, Gamdangmi (foreign mi) achi uh sang a thupizaw ahi hi. UID akipan koiman juou genthei nonlou diing (Vote 5/6 khe thei nonlou diing), min neu (alias) Eg. Mangminlun @ Lulun chie zangthei nonlou diing, a tahsa vun rong (colour) khel zongleh kilamdanna nei theinon tuonlou diing chia chiemte na die kisiem ahi hi. Masangin India khuo-le-tui hina dia I Card isiem chiengun, melchina (black mole) in, itahsa tunga chivom in ahingna chiemte ua, tuasang ahoizaw din UID hingsiemkhe kiaun, tuami kizang ahi

1.i. *Bangdinga Khutzung (Finger Print) leh Mit tang laivom (eye rays) kizang sese la?*

Masang a Finger Print leh Mit tang laivom kizanglou in, tua bangjie kizang la chie dohna siemnuom tampi um ngei diing hi, mawlta in hichin hilchien vai, leitung a koima Mit tang laivom leh Khutzung (Finger Print) kibang umlou, tuami jieh India mi-le-sa hinadin tami hing kizang ahi, ajiehpen masangin Border akipan India mi hiloute hinglut in India gam sunga mitampi athat uhi, tuate theikhiet nadie hing kizang chilei tomkim a genkim pen va. Leitung khantouna asan dungzui in, mi khen khatten ID tuom tuom zang in Kumpite asol ua, tuban asol theinonlou nadiing uleh mimal hamphatna ami mama in akila/akitan theina die India mi zousie chiemte nadie kisiem ahi hi. Tuami jiehin Phaituol leh Zoudawn lam a tami hingkipi bawlta hi.

Mi khen khatte India misingsimna (cencus) a kila ngamlou atam mama hi, bangjieh inla? ichileh, tami khu Setan nambat kipatna hita achi uhi. Agetnasan uh ahileh, Real ID hing siemkhepa thugen khu CD a record un mi zousie a ensa uhi. Nanleh tam Real ID leh UID kibatna umvawt lou ahi chizong nathei angai hi.  Real ID toh kisai in Canada gam a milien khat, hagau mi mama khat amang (dream) anoplou jieh in hichin anagen hi, _“Tam Real ID khu kathun a, sum koina diing kachi ahi. I ut utna a vakoi thei, bangma toingailou. Card zat ngailou, Bank a valut lei, isum neizat hing kilang maidiing, idei zaza lakhiet thei diing, ahivang in ka mang anuomthei vawt sih hi”_ chin anagen hi.

Aadhar Card toh kisai a *Devender Reddy* gendang ahileh, _“Tulai tah a Kumpi nasemte dia tam Aadhar Card khu poimaw mama a, tualeh Center leh State akipan Scheme tuom tuom hingpei theina die kibawl khie ahi”_ achi hi. Tualeh agenkia na a, Aadhar Card tungtawn a ihamphatpi diingte ahileh:

i.                    Beneficiary indentification

ii.                  Social benefits delivery service (DBT under MGNREGS,Student Scholarship etc)

iii.                Demography and development planning

iv.                Improve efficiency of administrative processes

v.                  Preventing leakages

vi.                Unified view of beneficiary

vii.              Remove of ghostbenefeciaries from the system

viii.            Timely and exact transfer of benefits

ix.                Highly accessible and secure cash disbursements

x.                  Ensuring citizen-certri governance, chite ahi hi.

 

2.      *MICROCHIP ICHI BANG ADIEI?*

Mi khen khatten UID (Aadhar Crad) guoh hilou aban ah Micro-chip hing kizang kie ding, tuami pen amang theinonlou diing Setan nambat hi diing ahi, chia theichien loupia gen koikoi leh mite gingtasa atam mama hi (ponthaw thou uh e khai!). Ahinla amaute genna khel a Chip kibawl nasan mawlta in igen diing uhi.  Tami khu Europe gam 1^st January, 2001 kum in EURO Sum a hing kilang khepan ahi. Tami khu Motorola Companyten asiemkhiet Cridit Card ahi. 1^st in Mondex Smart Card akipan Micro-chip, micro-chip akipan Biochip hing suokhie ahi hi. A letdan ahileh 0.75mm ahia, a saudan 7mm ahi, agoldan Buhum chiepha (Grain of Rise) ahi.  Tami sunga “Lithium Battery” akikoi a, tami khu mihing tahsa tunga pan charging kibawl thei ahi. Zatthei nadie atest na un Dollar 1.5 million abei a, tami khu mihing Talpang (forehead) leh Khutzung kal ah a koithei die kisiem khie ahi hi.  MONDEX min khietna hileh Mon-Monetary (sum lampang) DEX- Dexter Right (zietlam) china ahie, atup (aim) ahileh, “Sum na khut sunga aum hi” chi ahi. Tam Chip symbol din Mittha (Butter-fly) akizang hi. Tami nakikap nia kipan kinuola khiet kie theinonlou diing ahi chin akigen hi. Microchip leh India UID akibang a gen khawmpen sildih hilou in, genkhawmlou mawngmawng diing ahizaw hi.

2.i. *Akisiem nasan (purpose)*:

Masanglai in mihausaten Sum khu Sumbawm a ana puo ua, hun hing kikhel/ khangtou in Money Order/ Bank Cheque ah kipuo in, tuasangin hing khangtou zawsem in, tun Mihausaten a sum puona diingun tam Microchip/ Biochip ahingsiemkheta uhi. Tami khu adie in gam khangtou North America leh Europe gam a mihuasaten azang uhi. North America gam a Real ID leh Very-chips achi ukhu, Kumpi’n amite achiemtena die abawl hilou in, Mihausaten a Gou (asset) u aman theilou na diing ua, miten aphuolsa louna diing uleh mi khutlum ah ashi kha leh zong, ahilou leh tuipi sunga a ashi khata uleh zong Sattelite Antena in asuikhiet thei ahijieh ua, sum koina die kisiemkhie ahibou hi, chin mipil misiemten anagen uhi. UID leh Microchip khu Setan nambat dia kisiem ahina hi nachi ngam nalai leh theizou nonta sing maw, theichien loupe jau na hileh na kigel pha ngaiva chi ing.

3.      *SETAN NAMBAT 666 UMZIE*:

_“Tanah pilna apoimaw dan aki lang hi. Koipou theisiemna neaten gamsa nambat tuot heh, aziehpen mihing nambat ahia, anambat pen zaguh sawmguh leh guh ahi”_ Kihilna 13:18 nan agen hi. Tami toh kisai a ngaidan umte ahileh, Mihing khu ni 6 nia kisiem ahia, mihing in theitheina 6 akinei hi (Bil, Mit, Kam, Nakuo, tahsa a sia-le-pha theina leh hagau a theina). Pasian nambat khu 7 ahia, Setan nambat khu 6 ahi. Mihingte khelna ahingpuo lut tachiengin asunga Setan atengta hi (mi zousie sunga nambat 6 umchiet danta). Tuami jiehin mipiengtha lou zousie khu nambat 666 NEISA ahimai uhi. Aziepen Setan ta ahingpieng ngen ahi jieh un.

3.i. *Nambat 666 kizat dan tangpite*:

i.                    _Computer UPC Barcode din 666 akizang hi_:

Tami toh kisai Terry Cook in alaibu gel, (The Marks of the New Wolrd Order, 1996, pp.376) na sunga hichin ana giel hi, “…. The entire system (UPC barcode) is very deceptively around the infamous numerical configuration. Biblically known as 666, the mark of the Antichrist or devil (Rev. 13:16-17)”. Tualeh Mary Stewart Refits in alaibu gel (The New Money System 666, 1982, pp.xii 206) na sunga, “The Prophets John identified this Cashless System of Commerce 1900 years ago one in which business would be transacted with a ‘Mark’ and a Number; the Mark will obviously be a Barcode; the number will be ‘666’, the comination of the two, about which will read in this book, will be an integral part of th ‘666 system’…. Receiving of one’s own volition the mark (Brain) in the Right Hand or Forhead; which I believe will be a Ba Code facsimile incorporating a conceaed use of ‘666’ unintelligible to be eye….. ” chin akigel hi.

 

ii.                  _Euro Sum Gam khet khatte zatdan_:

Euro Sum a Nambat 666 akigiel hi. AD 90 leh 100 lain Lungsiet Johan in 666 ana gen hi (Rev. 13: 18), tun kum 2000 ahingtung nuo in pasien theilouten tam nambat 666 ahingzang papanta uhi. Tuin leitung pumpie pasien theilouten tam nambat 666 khu natangpin atoisang mama uhi. European ten Common market chin ahing kizawp khawm ua, akithukimna bangun Sum tang khat zatkhawm diing chi ahia, tua sum cheimte nadin 666 khu kum 2002 akipan azangta uhi.  Canada gam a sum a kimawlna (money game) anei ua, tuami khu pen tuisan in 666 agiel uhi. Bangjieh tami ajat uh adiei? ichileh India a Budhist siampu Daalai Lama, miten angaisangpa uh agam ua avazin lai un, tam miten bangchileh ka gam uah Sum lam a ka khangtou thei diing uai? chie ana doh lai un, Dalai Lama in Nambat 666 zang ulechin angchi a, tuami kum 7 kazat uleh ka hung hausata uhi, achi uhi. Tualeh Pasian hing theilei Asia gam sunga aguh a kipawl khawm gam 7 aum a, tuate ahileh, China, India, Burma, Pakistan, Thailand, Malaysia leh Indonisiate ahi ua,tam tengla a China alienpan ahi. Millitary Highway asiem a, tuipi sung akipan gamsa khat ahingpot doh a aman lutang 7 leh ky 10 anei hi. Tua tuipi khu ginglou mite a ensa a, nambat 666 tuipi apan ahing kilangkhie hi, chin akigen hi.

 

iii.                _Laisiengthou akimudan_:

Tam nambat 666 khu Setan in amite a chiemtena (identification Nos.) a kizang diing ahia, Setan van zah poimawtah ahi diing hi. Tualeh tam nambat 666 hing pienkhiet dan khu- Goliath Teipi gihdan shekel 600 ahia, Nebukadnazar Lim Tong 60 a saang ahia, availam Tong 6 a lian, tam teng akigawm leh (600+60+6: 666) hing kilangkhie ahi hi (1Sam. 17:3-7).

4: *SETAN NAMBAT 666 KIZAT HUN DING*:

Setan Nambat 666 kizatna diing hun igen diing laiun, Thuogimna umjieh igen masa diing hi. Tami toh kisai ngaidan 3 te ahileh:

i.                    *_Amillenialism_*: Tamte ngaidan in Rapture umlou diing chin agingta uhi.

ii.                  *_Post- Millenialism_*: Tamte ngaidan ahikie leh Kum 1000 leenggam zouchienga Rapture umpan diing chi agingta uhi.

iii.                *_Pre-Millenialism_*: Tamte ngaidan ahileh Rapture ahileh Gimthuohna hun masanga um diing ahi, chin agingta uhi.

Ei Evangelical ten ipawm uh ahileh Pre-Millenialism pen khu ahi. Aumjieh khu Rapture khu Thuogimna hun masang aum diing china ahi hi.

 

Aadhar Card kilah nadia Khutzung leh Mit tang laivom kila jiehin, gingtu khen khatten Laisiengthou a kigen Setan Nambat 666 hita chie kila ngamlou Southern Manipur a Gingtu kichite lah a mi tampi aum nalaipen lamdang kasa mama hi. Laisiengthou a Setan Nambat kizat na diing hun ahileh maw hing gen vang ei. Rapture nuo chienga siltung diingte ahileh:-

Rapture chiengin Huikhuo a Gingtute Mangpa Jesu toh Moupawi azang diing ua, tuaban a Nuomman hawmnan azui diing hi. Tua Numman 5 kihawm diingte ahileh:-

i.                    *_Hinna Manglukhu_*: Tami khu Jesu min a Martal a shite adiing ahi (Jak. 1:12, Kih. 2:10)

ii.                  *_Thpina Manglukhu_*: Tami khu Hattuom Upate Jesu adia gin umte thanuomtah a belam enkol a, kem a, vahte adiing ahi (1Pet. 5:2-4).

iii.                *_Kipahna Manglukhu_*: Tami khu Hagau mangthai mante, Pastorte, Sawltate, leh Missionaryte adiing ahi (1Thess. 2:19-20).

iv.                *_Dihtatna Manglukhu_*: Tami khu Jesu hing peikia diing kinemtah a na ngah zingte a diing ahi (2Tim. 4:8).

v.                  *_Setheilou Manglukhu_*: Tami khu Jesu adi leh jal a, tam leitung thanophuoi lah a kideh zoute, kisusiengthou zoute a diing ahi (1Kor. 9: 25-27).

 

Tam bang teng khu Gingtute leh Mangpa Jesu’n Vanthamjol/ Huikhuo a azat diing lai un Leitunga gingloute adin Kum 7 sung Gimthuohna aum diing hi. Tam ginthuohna khu hun 2 in akikhen diinga, akimkhat masapen leitungah lemna leh muonna a um diing a, nanleh ahun nukhie pen khu *Gimthuohna Thupi* (The Great Tribulation) kichi hun ahi diing a, tua hun chienga sil tung diingte ahileh:-

i.                    Setan leitunga hingki halut van, mi tampi ahing sol diing hi

ii.                  Isrealten Setan angnuol diing uhi (Thuogimna hun masapen a Kumpipa ah apom diing uh ahi).

iii.                Setan nambat 666 hing kihawm diing in, tami nambat neiloute’n bangma alei theisih diing ua, Setan leh a galkapte apat suhgentheina athuoh diing ua, koima’n apanpi theisih diing uhi.

iv.                Tam nambat neite lah Setan chiemtena ahi jiehin, gawtmun adia chiemte sate ahita uhi.

v.                  Rapture a kila louteng Pasian adie shitan a (martal) athuo muolsuo jou uleh, amaute die hundamna Kot neunou hing kihong ding hi (Mt. 10:22).

vi.                Tam hun abei kuon chiengin Armegedon galpi ahing um diing hi (Rev. 16: 12-16).

 

*Akhupsitna*:  Tunia ithugenpen mi khen khatte adin hou maithei van, nanleh UID khu Setan Nambat ahi chie kila nuomloute adin ahoi din ka gingta hi. I gam mite lamdang kasa na khat hing gen vang, Pi Jacintha Lazarus DC ahilai in, tami thu kipan ahia, koima Lim kila nuomlou, aziehpen Setan nambat achi jiehun, nanleh DC nun na kila lou diing uleh Job Card apan Sum namu nonlou diing uh achi leh, kila vapuol mai. Ka gen nuom pen ahileh, Aadhar Crad adie lim kilapen Setan nambat hi in, Job Card a sum mu nading ahileh Setan nambat hilou, koi sol ihi diing uai maw? igensa ma bangin UID na kila nuom lou leh Manipur Kumpi’n Bill 3 tungtawn in Gamdang mi angchi uh pen nepte hing hi diing ahi. Bill 3 pen Manipur sunga kizang diing ahia, UID pen India gam sung a kizang diing ahi. UID pen India gam sunga kizang diing ahia, Setan Nambat pen leitung pumpi a kizang diing ahi. UID pen tunia kizang diing ahia, Setan Nambat pen Rapture zouchienga kizang diing ahi, apiengtha teng huikhuo a Mangpa toh Moupoi akimang ta diing a, Gimthuouna Thupi hunchie tami kizang pan diing ahi. Aadhar Crad khu Setan nambat ahita leh Nang Gimthuona Thupi (The Gret Tribulation) tan dam dia kingaisut nalai maw? UID/ Microchips khu Khutzung leh Mit tanglai vom chiemte na ahia, nanleh Setan nambat ahieh Tal pang leh khut zietlam a kichiemte diing chi ahi, tualeh UID pen tunia kizang in, Setan Nambat pen Gimthuohna thupi hunchie kizang diing ahi. Bangteng genzong lei ka thukhupsit nuomna ahileh, Setan nambat tuhun a kizang lou diing, Gimthuohna thupi chienga kizang diing, Setan nambat a na buoi sangin KA PIENGTHA EI chin na HUNDAMNA diing lampi kisui in, Aadhar Card sangin Jesu gingta zaw in, na gingtatlou leh Aman MEIDIL a hingkoi diing ahi. Aadhar Card (UID/ Microchips) khu India gamsung bou akizang diing ahia, Mangpa Jesu Sisan a hundamna in Vantha leh Leitha tan a kizang diing ahi. Tuami jiehin Setan nambat chie Aadhar Card (UID/Microchips) kila diing najau nonsinlen kila in, kei ngel in zong Aadhar Card ka nei/ kazat ahi, na zauzaw dia ka hing deisa ahileh Mi Piengtha lou zousie, mihausa, mipil leh misiem, kamnal leh gensiem hizawng lechin na maban diing khu MELDIL ahi, tuana kipat na na suotat nadin Laisiengthou in, “Mubai a umlai in Mangpa khu sui inlen, nailai in han in….. Tu khu hun kipah um ahia, tukhu hundamna ni ahi….. hing peiun ngaituo khawm vai Magpa’n achi hi, na mohnate uh sisan bangin san au nanleh vuobangin ka vam sah diing hi” agen hi (Isai 55:6-7, 2Kor. 6:1-3, Isai. 1:18). Aadhar Card a buoinon lou din simtu zousie Mangpa’n thupha hingpe chiet tahen, chi ka thumna ahi hi.