JEPHTHA IN A TANU MAITAM AH ALAN TAHTAH NA DIEI MAH?

 By Rev Dr M. Thangboi Zou

Tangtel: Tuachi’n hichi ahiding hi, Ammon mite kunga kipat a galmuonga innlam zuona ka hing kile kia hun chienga, ka inn kotpi a kipata kei hing dawn dinga hing pei masa penpen Mangpa a ahi dinga, tualeh halmang kithoina’n ka lan ngeingei ding hi achi hi. Tualeh hichi ahi a, hani achin zou in amanu khu apa kungah ahing kile kia a, tuachi’n apa’n ana kichiemna dung zui in, amanu tungah abawlta hi (Vaihawmte 11: 31, 38).

Thumapui: Anai leh gamla akipat tam ahawmthoh huoi “Gospel Tangkou” simtu zousie Kum Tha chibai hing buh masa ing e.

Tunia ikikup ding thupen, kei banga thuchien theinuom aup a amaute adia panpitu ahithei kha leh chiah chinglou leh siemlou pumpum a Study ka hing bawl ahia, mihing hina zal a sutkhiel leh val aum leh Pasian leh simtute kungah na ngaidamna uh ka hing ngen masa hi.

Vaihawmte Bung 11 sunga Jehpthah kichiemna pen Laisiengthou sunga a kibuoipite lah a khat ahi hi. Mi khen khatten tamna Jephthah in Pasian kunga kichiemna pen atahtah in sutang tungin atanu Halmang sillat in alan hi chia gingta zong misiem tampi um veve hi. Tami toh kisai a ngaidan tamlou anuoi ah isutkhawm ding hi.

Tamna Jephthah kichiemna thu khu akhang akhang a kinieltheina khat ana hizing hi. Jephthah galsatdia akuon ding kuon a, “Guolzou a innlam na hing kilehsah leh kei lamtuodia hing pei masa penpen maitam/ halmang kithoina kahing zatding ahi” chin Pasian kunga ana kiciem hi. Pasian kunga athum dungzuiin Pasian inzong athumna asanpia hi. Galjou ah innlam ahing kile in anei sunsun atanu’n ana lamdawn masapen hi, Jephthah lunggel dan ahileh Ganta, Sakolte, Uite, himai thei ahi. Ahinla agellou lam tahin a tanu neisun in ama lamtuo dingin ahung tai hi. Tamin apa lungtang asuhna mama hi. Pasian kunga akichiemna bangbangin abawlta hi kichipen bangchibang lam a kichiemna adiei akithei zou sih hi.

Tam toh kisai ngaidan atangpi in chi 2 in akikhen thei hi, tuami ahileh:

1.      Jephtha in a Tanu tha ngeingei ding hi:

Tamte ngaidan neite dingpi dan ahileh, tam anuoi a bang ahi hi, tuate ahileh:

 

Ngaidan khatna:

Jephthah in atanu maitam ah alat tahtah ana diei? Tami thu toh kisai a ngaidan khenkhatte ahileh:

i)                   Kimkhatten Jephthah in atanu maitam a ana thadan in agel uhi.

ii)                 Maitam a sisan suo Tahsan/ginna nasep nakhu kituolou thutuom ahia, Jephthah innsung umzia (family background) kisuhlou-jolta toh bang ahizie khu ta-le-nau lat thei ahichia ana bawl hidia gintat aum hi, chin agel uhi achi hi.

 

Amauten Jephthah in atanu halmang sillat in alan ngei hi, chia agingtatna jieh te uh ahileh:

i)                   Ama tenna pen Jordan gal langkhat ahi

ii)                 Biehbu toh a kigamlatna

iii)               Biehna lam a kibawl tom (hypocrite) khat ahina

iv)               Ninam dangte lah a mihing a biehna amu jieh un

v)                  Guolzohna ding bou lungsim a nei man in, chi uhi.

 

Ngaidan Nina:

Mihing a halmang kithoina/ sillat pen Mosi Dan toh kituolou/ phal hivawtlou ahi hi (cf. Siem. 18: 21, 20: 2-5, Danp. 12: 31, 18: 10 chite simin). Laisiengthou siem khenkhatten Jephthah in atanu halmang sillat in akichiemna bangin bawl hi (11:39) achi uhi. Nanleh Laisiengthou siem khankhatten, “Jephthah in ginglou mite tondan (semi pagan culture) lah in, tuami jiehin atanu halmang sillatin lan tahtah nahi” chin agen uhi.

 

Ngaidan Thumna:

Jephthah kichiemna leh suh tangtunna toh kisai a, Jephthah in atanu pen athat tahpi ma hi, halmang sillat banga alat ahi mawngmawng hi chi ngaidan khat a um kia hi. Tami ngaidan leh pomdan khu Laibu giel minthang tampi’n apompi uhi. Tami ngaidan neite’n a kupnop uleh gennop khu tam anuoiate ahi.

i)                   Hebrai ham a Halmang Sillat a kithoina chipen “olah” ahi a, tami in agenpen khu Thuhun Lui laibu te dungzui in adih ma hi.

ii)                 Jephthah ngel zong Pasian hing bekhalou kizuoh numei Zonah kichi khat tapa ahibou hi. Tunua chiangin gingtu mimal khat injong mihing hinna toh Pasian kunga kithoina ahing bawl ding gelkhawlthei ahi hi. 2 Leengte 3: 26-27, Tami Laisiengthou Bung leh Tang sungah, Moab kumpipa’n atapa upapen, halmang sillat kithoina sillat in akhopi kul dawn ah a lanta hi.

 

2 Khangthute 28: 3 na inzong, Ahaz in zong atapate mei a hallumin kithoina abawl dan agen a, 1Leengte 21: 6 na ah jong Manasses in atapa halmang sillat a alatdan agen hi. Israel lamkaite’n ahun nukhia lam ua tambang silchin mulkimhuoi ana bawl ua ahileh, tuhun masate ah jong ang kipan thakia moh sih ding hi.

 

Jephtah zong Israel tate kunga vaihawma apan vangin, thukhensatna ging taha abawl khu adalthei tuon sih hi. Tuahun lai taha mite’n apeipi dan tangpi khu hindan siengthouna leh hagau hinkhuo kijopna toh kisai a mahni sie-le-pha theina dan a hin ahimai hi. _“Khum hun lai in mite’n ama uh mitmu a hoi asah dan bangzel un agamta uh”_ chi ahi mai hi (21: 25). Israel lamkai tamtahte khu tami ngaidan nei in hinkhuo ajong uhi. Gideon in Siampi konggah san siengset a jep a bawl sah vangin, Israelte khelna ah a puilut a, Samson in jong Mosi dante kalin gamtatna hoilou tampi anei hi.

 

Jephthah in Israelte 42, 000 kithana atut thei leh (Vaihawmte Bung 12 nasung sim in), Pasian mai a athu chiemte jong suhbuching ding hi chi gintat a huoi mama hi, achi hi.

 

 

Ngaidan Lina:

Kum Zabi Khat lai a Juda Tangmi sutsiemmi Flavius Josephus leh Khristian Hattuom Pata ten (Christian Church Fathers), Jephthah akichiemna bangin atanu halmang kithoinan lan tapi uhi, chin agingta uhi. Laisiengthou mun dang ten agendan in, Jephthah tanu thakhel ding khat kizang ahi, (Abraham in maitam ah atapa Isak thatdia akisah laiin, Isak thakhel in Balam azat pen apom bang a ngai ahi) achi hi (Siem. 22: 13). Pasian in Igypt gam a ta pieng masate atha lai in, Israelte tapieng masate ana peikan hi. Tua Israel ta pieng masa atha loute Ama adia atuom koi ahi. Ta leh ganta masa zousie Pasian ah ahia, tua ta masa tat khietna dia Ganta kithatpen in akilan mite suotat sahna apiapen Siampute bou in abawl thei giep ahi hi (Pawt. 13:1-2, Nam. 3: 11-13). Tualeh Judate Talmud, Midrash leh Josephus laibu Antiquities of the Jews in “Jephtah in atanu pem halmang sillat in pe tahtah in, a sisan toh Pasian kungah biehna nei tahtah hi”, chi uhi.

 

Tamna atung ateng khu “Jephtha in akichiemna bangin a Tanu halmang sillat in lan tahtah na hi, chia apomdan uh” ahi hi. Alang khatlam ah (Theologian) Laisiengthou siem khen khatten apomlou dan uh anuoi ah ensuh kia nalai vai ei.

 

2.      Jephtha in a Tanu tha vawtlou (lanlou) ding:

Tami toh kisai ngaidan neite dingpi dan ahileh, tam anuoi a bang ahi hi, tuate ahileh:

 

Ngaidan khatna:

Laisiengthou siem khen khatten atung akigente pomsiem thei vawtlou uhi. Aziehpen Pasian in mihing a kilatna pomvawt lou uhi, chin gingta theilou uhi. Bangjieh amauten Jephthah in atahtah in bawllou hi, achina santé uh ahileh: Pasian in tate zang a kilatna pen deilou in zong mudah hi (Siamp. 18:21, 20: 2-5, Danp. 12: 31, 18: 10, Jer. 19: 5 chite sim in), tua bang biehna zousie lungkim in sang/ dawng ngailou hi. Tua ahileh, “Jephthah in akichiemna bang in abawl hi” (11: 39), achipen bang genna adiei?

i)                   Halmang sillat kichi himhim i et chiengin Heb. Ham in ‘olah’ akichi hi. Tami Kammal himhim ah “mei” kichi pangvawt lou hi. Tamin agetnuom pen ahileh “Kipumpiana, Kipum-apna” china hizaw hi.

ii)                 Jephthah tanun ajaupen shi ding hilou in, ahinkhuo pasal neilou ah aum ding khu ahizaw hi (11: 37-39). 11: 39 nan agenpen, “amanu nungah in aumsuoh hi” achipen shi hi china umlou hi.

iii)               Mihing a halmang sillat kilatna zousie Pasian in mudah ahiman in tuabang biehpiana/ halmang sillat pomvawt lou ding hi.

iv)               Tamin Jephthah tanu khu ahinkhuo pumpi Pasian kunga apieh hi. A kipumpieh dingin pieh hi/ lankhia hi. Jephthah in tanu leh tapa dang neilou ahiman in a khanggui bei mangding nuom, inn-gam ding ahi manin tua mama nasa sengin atanu a kapkap ahi hi. Atanu in “Pa aw, nungah siengthou kahina va sun vang” (11:37) chin ngen hi.

v)                  Tuami bangchi um ding e? Pawt. 38: 8 leh 2Sam. 12: 22 a bieh bu nasem numeite khat in um/ pang hilel zaw ding hi.

 

 

Ngaidan Nina:

Jephthah in atanu Halmang sillat in lanlou ding hi (30-31) achi hi. Aziehpen Jephthah in atanu halmang sillat ah alatlou nazie 2 aum hi. Tuate khu:

i)                   Mihing zanga Halmang kithoinapen Pasian deina toh kilehbul in Pasian deilou bieh piehna ahilam thei jou tading hi (Siem. 18: 21, 20: 2-5, Vaih. 12: 13, 18: 10-12 chite simin).

ii)                 Amanu khu nungah siengthou khat ahi (pasal toh lumkhawm nailou- Virgin ahi) china ama tahsa pumpi Pasian adingin ahing biehpiena toh kilankhia zousa china ahi hi. Ahinkhuo pumpi biehinn ah nasem in um tawntung china ahi hi (cf. Pawt. 38: 8, 1Sam. 2: 22)

Gentenan: Samuel Shiloh biehinn sunga a hinkhuo pumpi zangdia anu’n apiekhiet toh kibanga Jephthah in zong atanu Biehinn a nasem dia alatkhiet toh kibang ahi hi.

 

Ngaidan Thumna:

Jephthah in atanu Maitam a nasemdia apiadoh ahia, athat tahtah sih hi, chia Bible siem (scholar) tampi mudan leh agintat dan uh ahileh:

i)                   Jephthah in atanu khu maitam a alat hilou, hinanleh adam sunga zineilou a Pasian maitam adia ana piadoh hizaw ahi.

ii)                 Maitam a mihing sisan a kilatna khu Pasian adia deihuoilou silk hat ahi. Tuami ziehin deihuoilou khelna bolding in Pasian in Jephthah zong ana sol teitei sih ding hi (Danp. 12: 31, 18: 10, 2 Leengte 21: 6).

iii)               Abraham ngeizong atapa maitam a landin ana um a, nanleh akigelna/ alunggelpen mudoh a aum chiengin sisan asuo din ana kiphal sih hi.

iv)               Laisiengthou in Jephthah in tanu ashi hi kichi sangin Ama khu nungah siengthou ahidan leh pasal toh kithuoh khahlou (pasal neilou) ahidan agenchiengzaw hi. Tualeh tulai a unau Catholic ten Father/ sister te apeipi bangun ama zong akhangdawn hoilai tahin pasal neilou a Pasian maitam a nnasemdia kipedoh ana hiding in gintat aumzaw hi (Vawi. 11: 39)

v)                  Pasian maitam a nnasem dia aum masangin aloite toh Ha Ni (2 months) sung a khangdawng hinkhuo ava zangkhawm ua, tua jouin akichiemna bangin Apa’n Maitam a din ana alan/ /piedoh/ soldoh tahi.

 

Ngaidan Lina:

Tambang thute ah, tuni in Vaihawmte Bung 11 na toh kisai ah lahdan chini a um hi. A Khatna pen ahileh, “Jephthah in atanu athat sih hi” chi ahi. Tami thu khu Conservative Theologian tampi ngaidan ahi hi. Tami thu toh kisai pansan tangpite tam anuoi a bang ahi hi:

i)                   Khumi hun lai a Pasian in azahda mama mihingtasapum a kithoina thute khu, manghil vawtlou in, thei mama ding ahi (11: 15-27). Tuaban ah, Amamaitua a kipahpi dingin, Innlam nuasia in mi ahing pei ngei ngei ding hi chi thei mama ding hi. Bangteng hitaleh tambanga galzawna loupitah tangah Pasian kunga maitam bawlna dingin, gan sisanpen neu taluo i chi thei ding uh ama? Jephthah kichi khu Pasian mi mama ahi zieha Hebraite Bung 11 na ah jong kitahlang va-ia ahi hi. Atanupen, ahinna lah a, thalup ding hileh, anungah siengthouna uang gengen in aum non sih ding hi (11: 37-39). Tambang a tanu hil-hial thahna pen Jephthah in a bawl malmal sih ding hi aziehpen Mangpa Hagau Siengthou zong atunga tungzou ahi ta hi (11:29). Tami hunlai a Shiloh mun ah Tebernacle bangzat ahieipi khat ana um hi (1Sam./ 2:22). Tambang ahizieh in, gualzawna thupitah Pasian in a piah leh, Jephtha in, ama innsung mi ngelngel khat Shiloh mun a Tabernacle a Pasian nasem dinga apiah khieh hizaw ngel ding in agintathuoi hi. Tambanga, atanu neisun, Tabernacle a Pasian nasem dinga, a inn-le-lou a hing kinuole non mongmong lou dinga Jephthah in atanu apiah khieh napen ahileh, Pasian mai a akichiemna suhtangtunna ahi hi. Jephtha adingin adahuoi vangut ma va-atanu mu ding kinepna a um non tasih a, amanu mama jong, amu kia ding hi chi koi in athei zou diei? Tambang ahizieh in, Tang 31 na a Jephthah akichiemna thu ah, kammal leh thuguol jopmat tu a kizang “and” kichipen “or” a hen zawh ding ahi hi. “Ka inn kotpi a kipata kei hing dawn dinga hing pei masa penpen Mangpa a ahi dinga, tualeh halmang kithoinan ka lan ngeingei ding hi” achi hi (31b).

 

Tambang ngaidan neiten agennop uh ahileh, Mang haam a “to lament” Tang 40 na akigiel khu “to talk to” chi a hen hileh atanu hinglai ahidan kohmu in a umthei ding hi, chin agen uhi.

 

Ngaidan Ngana:

Jephtha in atanu Halmang sillat dinga apiehna toh kisai gendan leh ngaituana, thumudan kibang lou um hi, tuate khu tam anuoi a bangin agen hi,

a)      Kum zabi 12 hunlai a misiem Juda mi thusui lian mama Kimhi kichipa in a laibu gelna khat ah, Jephtah in atanu that lou hi, “Pasian ading chi in innkhat ah umsah a, kholai ah mi toh kipawl khawmsahlou hi; pasal neilou, ahinkhuo pumpi Mangpa adingin pekhia, atanu in zong tuabanglien mahin um hi”, chi hi. Tuhun a numei  khenkhatte bangin pasal neilou ding, ahinkhuo pumpi Mangpa adinga kipekhia, Missionary dinga kipekhia kichi toh kibang hi tuah hi, laigiel khenkhatte leh mi khenkhatten tami thu pen gingta in, pom uhi.

b)      Thusuimi leh laigielmi khat Benzinger kichipa in laibu agelna khat a, “Jephtha tanu pen ahinkhuo pumpi pasal neilou in, Pasian nasem dingin kipia a, ashi dongin nungah in um hi; ama nasepna vangin, Jephtha in Israel mite tungah Kum 11 galdou louin, tawldam in aumsa sungin Jephtha tanu in Pasian nna chouchou sem hi”, chi kia leuleu hi.

 

Kei pawmdan leh ladan:

Keima khupsitna dan in, “Jephthah in atanu Halmang kithoina dia that tahtah lou in adamsung a Pasian nasem dia apiakhiet hidin ka gingtah zawhi”. Aziehpen Hanah in Shiloh biehbu a atapa Samuel apiekhiet bang hi ding ahi. Thuhun Lui laibu akipat leh Thuhun Laibu sungah kana et et chiengin, Mihing a ki laitan/ kithoina pen Bible in ahoi chia agenlam zong kamu khah sih hi. Pasian in Mihing a kithoina deilou ahidan kamu chiengin, “Jephtha in atanu thalou in, nanleh Pasian biehinn a nasem dia alatkhiet hizaw ding hi” chi khu ahi.

 

Gentena’n: Pasian in Abraham kungah, “Na Tapa neisun (Isak) in maitam hing bawl in” chin aphut a, nanleh Abraham in Isak khu Maitam tungah lumsah in Namta toh thadia akisah lai in, Pasian in phallou in, Isak thakhel dingin Belam khat apia hi (Siem. 22: 11-12 sim in). Pasian in mihing lungtang en ahidan akilang mama hi. Abraham in that ngam ahi ziehin Pasian in atha bangin pompia hi (ahin Isaak thakhel in Belam azang veve i).

 

Akhupsitna: Laisiengthou siem tampi’n athat tahtah hi chia gingta pawl leh thatlou in adamsung a Pasian nasem dia pekhia hi chin agen uhi. Tua ahileh Nang bang chin na khupsit diei? Athat hi, athat sih hi chia ipomdan adihlou leh Vangma tan theina vang ahisih a, thutanna ilanuom leh Laisiengthou thute isut uh ngai ahidan itheisiemna ding ua, tami Thupi ka hing gel ahi hi.

 

Laisiengthou theichienbe nuom ten “Thumna toh panga Pasian kunga nget thei ahi” ahin, Pasian dawnna zamanlou a eima mimal ngaidan a Laisiengthou ila/ ikai/ ipeipi leh hoina sangin sietna ahing tunzaw ding hi. Tulai Ginna (Faith) tuomtuom inei na zieh uh sildang zieh hilou in, Bible theichienlou a eima deidan a peipi te ziehin gindan tuomtuom ahing um hi, akichi hi. Tua ahileh, Nang “Bible theidan pen na Zi leh Na taten thei uh henlen, tuami peipi uleh na kipahpi na diei mah? Kei vang, ka theidan leh ka zuidan ka Innsung miten zong thei uleh, ka deisah mama hi”.

 

Mangpa Pasian in tami Article sim kha zousie, Lasiengthou thutah theibe na dinga ahun pengam a, atheichien be semsem na dia Pasian buon ngap/ ngam mi hichiet din Mangpa’n hing guolzawl chiet tahen, chi ka thumna ahi hi.

 

Laibu ette:

i)                   Davis, Dr John J, Conquest and Crisis, 1969.pp. 125-128 Edited by H. L. Willington, Willington’s Guide to the Bible, 2009.

ii)                 Donald C. Stamps, Tiddim Chin: Hilhcianna Kithuah LAI SIANGTHO, 1977.

iii)               John F. Walvoord, Roy B. Zuck, The Bible Knowledge Commentary OT, 1991.

iv)               MacArthur John F. Jr. The MacArthur Study Bible, Nashville: Word Bibles, 1983.

v)                  Rev. Edward A. Engelbrecht, The Lutheran Bible Study, 2015

vi)               Rev Dr. T.K. Muana, Thukhen-12te. 2017.

vii)             Pastor Lunneo, ama ahileh Kaulalampur, Maylaisia a Kuki Worship Service (KWS) a Pastor nasem aum ahi. Whatsapp tungtawn a angaidan kala in ka hing gel sawn ahi hi.