Zoute'n I tahsap uh "Zou Hero" ahi

By: Pro-Pastor M. Thangboi Zou

Thumapui: Anai-le-gamla ah simtah loukei a tam Local Newspaper simtu zousie kasepna mun apat chibai ka hing bawl masa hi. Tunia ikikup die ka hingtel tam thupi khu akhente adin nuizat huoi abang maithei a, nanleh hoitan ana sim in bang ngaidan na hing nei ei, chi ahi hi.

Hero Hilchetna: Tam kammal khu Mangham ahia, ei Zouham a hilchetna tampin genthei ahiei, nanleh ken mawlta in hichin ka hing letkhie hi, “Hangsan, kipengam, kiphalngam, tanngam, senngam, hamsatna bangbang um nanleh maituongam” chite ahi. Hero hihna min pen mi kimawpiepie theilou ahi, ipie diinga chitna neite ahileh, “atung a I gente shingap a maituo ngam a hing lawchingte bou kipie hi”, tam hihna (title) muthei diingte pen numei-pasal akikhenlou, apil amawl, anei-le-neilou a kikhenlou in, a tunga igente hangsanta toh semkhie mi koi hizongleh tami Hihna (Title) akipie hi.

Leitunga Hero masapen koi e?:  A tunga igenteleitung a muolsuo masapen khu, kei ngaidan in “I Mangpa Jesu ahi” ajiehpen, “Aman van thupina zousie, Patawina zousie, van a misiengthou zousieten, siengthou siengthou chie apatawi chimlou uh hinapin, leitung a mikhielte tankhie die ama-le-ama ang kipekhie a, Pasian hausatna zousie tanngam a, anamsie Bethlehem Bawnginn sung angtel a, migiloute khelna thaman in Kalvary Muol Singdawn ah ahinna hingpie in, ni thumnie thou in Pa zietlam ah atouta hi.” Tambang a leitung a mihing koima hingkipe khie a umlou jiehin, kei ngaidan in Leitunga Hero masapen khu Mangpa Jesu Khrist khu ahi, nang ngaidan in koi?

Tamna atung a thupi ni igente tungtawn in ei Zou ten (Zou suonten) itahsap pen uah ka thei ahileh, “ZOU HERO” ahi. Zou Hero hitheina din chitna tuomtuom genthei din umkhanava, nanleh kei pie diing hileh, tam anuoi a chitna neite khu Zou Hero piedin hoi ka sahi, tuote ahileh:-

Pilna, siemna lam a (Education):  Zou sunga IAS masapen koi hidin na gingta ei, koi dang hilou in Pi Mannuamching IAS khu ahi. Leitunga pilna siemna ahing khantou zinglai in, ei Zou taten Beihna lam leh tahsa lam thu a IAS/IPS/ IFS nei atung a igennu chilou kinei nailou ahia, tualeh Doctorate neithei (Theology & Secular) I khutzung hielei hiethei ding khawp in inei tawm mama nalai uhi. Tunia khangtha siemna leh pilna zil (Theology & Secular) ten Zou Hero hidin theitop hingsuo a pan hingla chietdin iki chou (challenge) uhi. Siemzilna lam a KOI E ZOU HERO hinuom, hidin pan hingla chiet din Pasian mintoh ka hing ngen leh chou hi.

Politic lam a: Idamleh imau kum chiengin MLA Election hing um diing ahia, tuami adin Gam-le-Nam ngaina mi tampi hing um diing ahia, kamsiem theitop zangin thu-le-la hing gen van un, tuana na pil vanglou leh I Nam adie natna lienpi tuntu na hing hi thei diing hi. Politician maimai kidei nonlou (kamnal a thugen) atah tah a nnasemte hing kitulmaw pan ta hi, ei Zou tedie I tanvou uh Singngat A/C a theitop suo a pan hingla diing tunin WhatsApp tung tawn in muthei diing ahi umpan tah a, tunia Zou ten Politician a REAL HERO  kidei mama ahita hi. Zou sunga Zou Hero hihna (title) peding hileng, tamte kunga ka pediing hi. (a) Lamkai Khamthei chinglou mi, (b) Phung-le-tang thu a vaihawm hilou in, Thudih leh thutah toh thukhen siem mi, (c) Pasian leh a Nam adia Thutah, thudih hinpi a zong shipi ngam mi, (d) Miten I Nam amusitlai a misitna pan dawmkang ngamdie kipe khie ngam leh (e) Election kun maimai a Nam-le-gam it, akaichie akichiemnate theiphalou mite hilou in, athuchiem a ginum leh tudet/pangdet mi, tunin I nam in akitulmaw tahi. Ka nam mite aw, tamna igente hoitan ngaituoh un, I Nam in tambang chitna neite atulmaw hi. Koi e “ZOU HERO” hihna langap die kipan khei diing? imiten haibang ahing ngah hi. Khangthate akipan khe ngam diing mi bangzat I umtai? (sietna lam thu a kipan diing hilou in, Pasian leh I Nam min tawisang nadie).

Pasian thu lam a: JCA kiphu chil a pan ei Zou taten Mangpa gam nna isepna uh kum 62 (i.e. 1954-2016) bang ichingta a Missionary nnasem a India sung/ apohlam kuonkhie ki umnai lou, tuoban a Nam dangte bang a Crusader, Revival bawl siem a Pasian a kizang thei mi 3 zong ki-um nailou, miten tampi a nei ua, tuaten Pasian thu toh a Nam sung uh apuo ua, Pasian thu ah akhangtou mama ua, amau sungguo hilou nam dang a zong akizang siengta uhi. (Eg. Evan. Damkhothang unau Paite hamzangte, Evan. Lunminthang Unau Simte te lah leh Nam tampite lah akizangte ahideu hi). I Nam Pasian thu a ihalna diing ua Mangpa ka nam sung ua Crusader leh Revival bawl a kizangthei mi hingpie chie thum mi bangzat ium theita diei? Tunia ei Zoute ituontuolna uh khu sildang in ka musie, Pasian a kizang thei diing mi itawm jieh uh ahi (Crusader/ Revival mi zoisie’n abawl theisie, nanleh Pasian kunga ngenlei tam bang a kizang theidi Mangpa’n hipe ngeidin ka gingta hi). Pasian nnasem Pastor, Evagelish leh mi koi zong Pasian thu a Zou sunga HERO hihna (title) neithei die Pasian kunga kilan ngam mi bangzat I umta uoi? Tunin Mangpa’n Zou Tate zong dawmsang nuomta hi. Koi e akipankhie ngam diing? Umlou diing ihi uh ama? Thumna toh kilan a tami Hihna tangthei din hanlung chiem chietvai, ei Pasian nnasemte, chilou uh maw!

Singer lam a: Nam dang La sa siemte i-et leh Love song akipan in Gospel a hingkipelut un, tuabang miten a Nam uh atawisang uah, nanleh ei Zou Nam sunga lasiem atamzaw (kamudan in) Pasian la a hingkipan un Love song alut in a la siemna zang akitam mama tamai hi, tamte jieh adiei? I Nam a tuontuolna khu! Zero to Hero ahoi a, nanleh Hero to Zero khu sil hoiloupen leh minsiet huoipen ahizaw hi. Tamna pan ka gennuom ahileh, Zou sunga lasiemte Gospel na san gal uleh, tuana diing kip unlen, Love song nasa uleh Gospel toh mekhawp sih un. Laisiengthou in, “Na lum leh lum kichien unlen, na vawt uleh vawt kichien un” achi bangin, love song leh Gospel song na hinghal thangchiengun I Nam adie khantouna sangin kiemlam ahizaw hi. Tuami jieh in Zou sunga Lasiemte “na awh hoina ukhu HERO hingtup un” chin ka hing chou nuom hi. Singju bangin na awh hoina uh hingzang non sih unlen, Pasian thupina din hingzang theita uleh chin I Nam adin ahoi diing a, thamlou in Nangma ngel adin ahoi die, Pasian kipahna banga na Awh na hingzat cheingin Pasian in Leitunga hingtawi sang thei hi, tuami jiehin koi a Lasiemna lam a ZOU HERO nuom? La siemte hing kipan ta un! 

Akhupsitna: Tunia Zou Nam sunga ZOU HERO hihna piedie kilawm kasa tamlou apoimaw igente khu hoitan ana ngaisut mawngvawi, bangchin nagel ei? Tamna ka hinggente pen I Nam in atasapte lah a poimaw kasate ahideu tangpi hi, Siemsinna lam a kituol ngiem nalai, Lamkai hoi a zong, tualeh Pasian thu a kizang, tamna akizang ichite zong khu a umna Hattuom hideu in, Zou Ham zangte lah a hinailou hi (Ka genkhiel leh kingaisiem vai). Tamna igente subu ching din Khangtha laisiemte leh tunia Pasian nnasem die kipkhie ten Pasian thupi na diing leh I Nam sung tawisang nadin theitawp suoin panla chiet vai, chi ka deina jieh a Zouten I tasap uh ZOU HERO ahi, chie thupi zanga ka hinggel pen, asimkha zousie leh azakha zousieten Pasian mukhiet nadiing leh I nam adie hinkhuo siengthou zanga, dihtatna, gin-umna leh thutahna toh pan lachiet din Mangpa’n simtu zousie thupha hingpe chiet tahen.