Khristian Lamkaina (Christian Leadership)

Seminar Paper on

KHRISTIAN LAMKAINA (Christian Leadership)

By Pro Pastor M.Thangboi Zou

Amasan Mangpa min ka phat hi. Tualeh tambang Paper lathei die deisahna hingpie Division Lamkaite tung a lungdam thu ka Phuong hi. Tunin mawlta in “Khristian Lamkaina” chi thupi pen iphat tuompi na ding un gendan tuom tuom in ikikum ding hi.

Lamkaina lah ah anuomloupen khu Khtisian Lamkaina ahi, chilei kikhiel lou maithei ahi, ajiehpen, “Ahatloute suhat ding, lampielte lamdih a puitu hi ding, akilemloute lemna bawlpie dingte, nnasep silbawl ah amasapen dingte” ahijieh in ahi. Lord Montgomery in, “Lamkai khu mipite toh kipol khawm/ kithuo thei mi ahi ding ahi” chin agen hi. Tualeh J. Robert Clinton in, “Lamkai ichi khu hamsatna mun, buoina mun a pat thupitah a mipite die nnasem thei dingte ahi” chin anagen kie hi. Peter D in, “Lamkai kichi khu Tupna sangpi/ lienpi nei a mipite lamhiltu ahiding ahi” chin agen hi. Peter G.W. in, “Lamkai khu silbawl theina nei a mipite lunggel theisiem mi ahiding ahi” chin anagen hi.

Lamkai kichi chi 2 in igen ding hi:

i) Khovel mi Lamkai ichite: 

a) Lamkai khu Thuneina (Power) aneite

b) Aman sep sawmlou in, midangte sep ding gengen mai

c) Lamkai ahihnapan akietkha ding jau

d) Mani hamphatna die nnasem

ii) Khristian Lamkai ichite:

a) Itna toh nnasem

b) Mi kingiemkhiet mi (a thulou thu saloute)

c) Jauna neilou (Thudih loute genkhe ngam)

d) Pasian kipahna die sem (Mihing maipha suilou)

e) Mite a die sepsa mi ahi.

Khristian Lamkaite theidie kilawm tamlou envai, tuate khu

1) Tup leh Ngim kichien neimi ahi ding ahi:

a) Kei koi ka hiei chi akithei zing ding

b) Ka umna pawlpi banglam a tasam, bangdin mun a ding ahiei chi atheikhiet sawm ding

c) Khantouna ding lunggel anei ding

d) Ka umna pawlpi bang chileh Tahsa, Hagau lam a khangtou ding, chite asui khiet ding ahi.

2) Mi hoite a etton ding ahi: 

a) Lamkai na hileh, namasang ah lamakai anapang mihoite enton in

b) Paul in, “Ken Jesu Khrist ka etton bangin, nouten zong kei hing enton un” chin 1Kor. 11:1 na agen hi.

c) Lamkai masate ana entonte ahileh:-

1. Joshuoa in Mousi a enton hi
2. Elisha in Elijah ana enton hi

3) Laibu tampi sim in:

Lamkai hi a Laibu sim tamlouten thutha, la tha bangma athei sih ding ua, tuachin a vaihawmna pen miten luisengta chin akipahpi nonsih ding uhi. Leitung vai hileh Hagau lam vai a tukhang a lamkai lawching ichite khu Laibu tampi simte ana hideu uhi, china akigen hi. Laibu simtamte ahileh:-

i) Tahsa lam a Laibu simtam a milawchingte:

a) W. Churchil (b) Joshep Stalin (c) M.K. Gandhi tea hi deu tangpi uhi

ii) Hagau lam a Laibu simtam a milawchingte:

a) Billy Graham (b) Oral Robert (c) David Yoggi Cho tea hi uhi.

4) Midangte Thu dawng in:

Lamkai lawching nahi nuom ah ahileh, na hileh na thei dingte khu:-

i) Kipilsa sinlen, nangsa Lamkai anapang masate (Seniorte) thu dawng in

ii) Nangsa naupang hi in, lamkai masa zaw a hileh thu dawng in.

Gentena:  Mousi in Egypt pilna siemna Kum 40 a zil nuoh in, Isreal mite apuisiem na dingi n, apu Jethro thu adawng hi. Tuamin lawchinna lienpi atun hi. Tuami zjieh nang zong mi dangte thu dawng in.

5) Hangsan in: 

Lamkai khat na hileh Thudih, Thutah a na hangsan ngam angai hi, mi hangsan louten bangma semkhe theilou ahi. tuami jieh a hangsan nadin in, tamlou gen vai:-

i) Thudih, Thutah kigen khiet ngamlou namun a Khristian lamkai mi lawching nahi nuom leh Hnagsan tan in nnasem lechin, Pasian leh na miten ahing kipahpi mama ding uhi.

ii) Hangsan tah in thugen in, vaihawm in (Koima maipha suilou in thugen, vaihawm leh chin mi lawching nahi ngei ding hi).

Gentenan: Mousi in Gamchiem enkhe die Isreal Lamkai mi 12 asawl lain, mi 10ten ava etkhietna gam mite uh a report dan ahileh, “Tam mite eite zawguol ding hilou, amaute khu milian, mi thahat, amaute toh eite ikite leh Khuongbai bangle ihi uhi” chin apieh uah, nanleh Joshua leh Kelap ten vang, “Mangpa toh panglei izou ngei ding uhi” chin hangsan tah a aapan jieh un, Gamchiem gam ala zou uhi. tuami jieh Lamkai nahileh hangsan nading mun a na hangsan ngai ahi hi. 

6) Thummi hisawm in:

Tualai Khristian L;amkai tampi alawchin theilouna jieh tampi um nanleh, atamzaw te khu Thummi ahilou jieh uh ahitangpi deu hi. William Law in, “Thum dingdan kisin siemten, hinna siengthou leh kipahna thuguh sinkhie/ zilkhie uhi” chin anagen hi. Khuleh WarrEn W. Wiersbe in, “Thumna amatam mama a, Pasian toh gingtute kihou theina dinguah Jesun a hinna toh analei khiet ahi” chin ana gen hi. England Kumpinu Queen Mary in, “Ka galte galvan thahatna sangin John Knox thumna ka zauzaw hi” chin anagen hiel hi. Lamkai lawchingten thumna tambang ah ana ngaisa lai a, tua nang na ngaisa lou leh milawching hibailou ding nahidan kigel pha in, thumna pibawl din iki ngen leh chiel hi.

Akhupsitna:  Khristian Lamkaina igen uh toh kiton in, atawpna din Proffeser N. Butler in, Lamkai anagen dante enzual vai:-

i) Lamkai ichi khu “Silbawl thei/ piengsa theite ahi”.

ii) Lamkai ichi khu “Miten bangsil apiengsa uai” chie gal et zong aum uhi.

iii) Lamkai ichi khu “Bang sil um e, chizong theipha lou lamkai aum hi” chin anagen hi.

Tamna kigen 3te lah a nang hoipen in na pang kha ei? Kigel pha in. Lamkai ihina ah zong kimaw ngiemkhiet seng zong hoilou ahia, ahin kiletsa pen hoi mama lou ahi, chi thei in. Lamkai gin um ihi theina dingun Mangpan tam Seminar Paper ngaikhe zousie leh apangkha zousie tunga atheisiem din Pilna, siemna hingpie in, izil khiette eima ma in, ihinkhuo zangkhe theidin thupha hingpe chiet tahen, chin ka thumna ahi hi.