Khristian Thugin (Doctrine)

P/Pastor M.Thangboi Zou

Area Pastor, Behieng Division

Thumapui: Tunia I Hagau hinkhuo uh Ginna lam a kalsang isuon theina ding uleh, idinkip thei nading un I Kristian Thugin (Doctrine) uh kihil leichin ka hing kisah hi. Koima hattuom dem sawm na hi louin, ikiven nading ua kikum zawlei chi ihizaw bou hi. I Thugin itheilou chiengin, I Hagau kalsuon na azong Ginna ah idinkip theilou ahiman in idinkip theina ding uleh iphattuompi kha uleh chie ka hingtel ahizaw bou hi.  

BIBLE:

Ei Evangelical thugin tangpi ahilen Bible bu 66 khu Pasian huhah khum, kithuhil nading, kitai hil nading in ahoi hi, khuleh Pasian huhah khum ahichin I gingta chiet uhi (2Tim. 3: 16). Evangelical kichina ahileh Bible khu Pasian huhah khum adilou umlou, ahi chia gingta zousie khu Evangelical akichi hi (Ps.19:7,Deut.11:18-19).  Tam taw kisai a gindan dilou te ahileh:-

Roman Catholic te: Bible bu 66 ban in bu 15 abe lap uhi, tuomi khu ahileh Aprocripha akichi hi.

Krist Hattuam ten: Thuhun Lui laibu teng khu Kross akilbet ahitah, Thuhun Lui a kigen Thu Thuhun Tha in alasawnte bou agingta uhi, atomkim aget ding in Thuhun Lui sangin Thuhun Tha agingta zaw uhi. Bible apan santé uh ahileh (Heb.10:9-10, Kol.2:14-15).

Seven Day Adventise te: Bible bu 66 gingta kichi nan uleh, alamkai masa un Mrs Ellen G. White laibu gielte “The Great Controversy, Patriarchs and Prophets, Bible Reading for the Home Circle, Review and Herald” Pasian huhah khum in ah agel ua, tuami in Bible sinsahna akikal mama hi (Rev.22:18-19 sim in).

Jehohva Witness te: Bible bu 66 pomte ahi uhi. Nanleh  thei ding khat ahileh Bible theibeh nading in alamkaipa u Russell laibu gel “Styudies in the Scripture” nasung akigen “Thutah tahlatna, thuguhte theipa”, tami laibu dawtzel ding ahi, achi uhi. Bible sangin Russel laibu gelpen thupi zaw in angai uhi, tuomi in I thugin u Bible kal ahi, chi thei vai.

UPC te: Bible zui kichi nan uleh, amauten athupi gel zaw te u ahileh Bible pulam a kilahna (Extra Biblical Revelation) Mengmuna, Aw jahna, Manglam leh Siltuoh (experience) tuom tuomte apibawl ua, Hagau mi in akigel lai un Bible pampaite ahi uhi.

KHELNA:

Pasian deilou leh tupdan toh kituoh lou a gamtatna khu Khelna akichi hi. Khelna hing pankhie tukhu Setan ahi (Ezek.28:11-19; Isai.14:13-16). Setan in mi masa Adam ahingsawl panta hi (Gen.3) Adam khelna ziehin mi zousie khiel in I um siengta uhi (Rom.3:23, 5:12, Eccl.7:20) tam bang khu I gindan uh ahi. Nanlen Khelna gingta lou pawlpi te ahileh:-

Roman Catholic te: amaute ngaidan in khelna chi 2 in akhen uhi.

(a) Khelna neu: Tangton shina tan tung zoulou khelna aum hi. Tami khu Niteng khelna ahi achi uhi.

(b)Khelna lien: Tangtawn shina leh gawtna atun theina khelna aum hi, tua khu Eden khelna ahi, achi uhi. Tami khu Evangelical thugin tawh aki kal hi (Rom.6:23).

2. Church of Christ te’n: Amauten Adam khelna (original sin) khu gingta lou uhi.

HUNDAMNA:

Pasian apat khiel ihita jieh un,eima hoina vang leh chitna vang in Pasian hepinamuthei ding in chitna inei ta sih uhi. Tuomi jieh in ei tang in mi khat akisam ta hi,tuomi pa ahileh Mangpa Jesu Krist khu ahi. Koipou Jesu Krist gingta zousie khu Hundam in aum thei hi, Ama khu Kumton Hinna,lampi khu ahi (Jn.3:16,14:6,1Jn.5:9-12). Hundamna tawh kisai a gindan diloute ahileh;

Jehova Witness te: Hundamna chi 2 in akhen uhi,

Deisa tuom pawl aum hi achi uhi (Rev.7:4-8, 14:1) tami isim leh mi 1,44,000 te bou hundam ding ahia, tuona apang dingte ahileh Apostle te leh amau pawlte ahiding hi, chin aki hil uhi.

(Thug. 1: 4, Ps. 104: 5, Dan. 2: 14) akigen bangin Armeggeddon kidouna zoutan a gin um te, bou khu hundam ding ahi achi uhi. Tamte ahileh Thuhun Lui a mi dihtatte leh amau pawlte ahi, chin agen uhi.

Amaute ngaidan in “Jesu shina in mi zousie ngaidamna/hundamna pezoulou” achi uhi. (Jn. 3: 16-17) tawh kikal ahi hi, Pilvang vai.

Seven Days Advt. te: Hundan ihina ding in DAN zuikim angai a, hundamna pen hichia um mai a muthei asih a, Dan thute hoi tah zuikim angai hi, chia gingta pawl aum uhi. Tam Dan ahileh Mouse dan te agetna ahi. ahin akhenten vang Pasian hepina liu-liau a Ginna jieh a hundamna muh ahi, chia gingta pawl zong aum uhi. Pilvang vai.

UPC te: gindan ahileh Jesu min bou a Baptisma in (Pa, Tapa leh Hagau Siengthou panglou a) atan leh hundam in um thei giep chin agingta uhi, tamim get nuom ahileh Trinity gingta lou china ahi, khuleh hundam dingte ahileh Hantuon ham (other tongue) a aham teitei ding uh ahi, achi uhi. (Acts.2:38 Explain in).

Churcu of Christ te: Jesu igintat a Baptisma itan leh hundam ihi ding uhi (Heb. 11: 6, Nas. 3: 38, Rm. 10: 9-10, Mk. 16: 16). Ginna, nasep (Baptisma) leh thunnun na panglouin, koima hundam ahi theisih (Jak. 2: 14-26, Gal. 5:6, Heb. 5:9, Ephe. 4:5, Kol. 2: 12, Nas. 8: 36-40 ). Pilvang vai.

Congregational Church te: Ginna jieh in mi khiel a khelna ngaidam leh hundam ahi. tuami jiehin hundamsa mihingte tam leitung a tahsa puo a damsung un khelna ah a puo thei ua, tuabang khelna jiehin a hundamna mansuoh thei ahi. Tam hundamna pen tangtawn dai die khatvei ginna tawn-a umden ahi sih a, mi khat shitan a atukip leh hundam ding ahi, chin agingta uhi.

Roman Catholic te: Mi khat in Jesu Khrist, hundampa ah a san a, Roman Catholic hattuom mi a suoh chiengin, hundam in a um ding hi.  Hundamna bukim leh atahtah khu Mishi khawlna mun (Purgatory) apan mihing hagau a suohtat chiengin ahi ding hi, chin agen hi. Agetnuom pen khu Roman Catholic Hattuom loute Vagnam kailou ding china ahimai hi.

Presbyterian Church te: Amau ten TULIP (T: Total Depravity= Siet dimdiemna, U: Unconditional Election= Mihing lam a nget umlouna teltuomna, L: Limited Atonement= Khel thawina phatawp nei, I: Irresistible Grace= Niel guollou a hepina, P: Perseverance of the Saints= Mi Siengthoute kepbitna) chi ahi hi. Tamna kipan tomkim aget dingin Hundam apien akipat telsa ahita ua, akitel khaloute bangchi tuh in kibawl hoi nan uleh hundamlou ding ahi, chi agingta uhi. Johan. 3: 16-17 toh kikal ahi hi.

SACREMENT/THUGOUSIA

Ei Evangelical ten thugousia 2 akinei hi, tuote ahileh 1.Baptisma leh Mangpa Nita Ann (Lord Supper) khu ahi.

(i)BAPTISMA:  Baptisma pen hundam nading a itan hilou in, Mangpa Jesu ashi a, athoukia ta, tuobang a ei gingtute zong shina pan ithou ding uh khu etsahne (polam mite kunga Jesu igintatna uh sulatna) ahi bou hi. Baptisma pen Hundamna ding hilou ahi, ahinla Khristian kichi zousie in abawl chiet ding ua Pasian thupi ahi hi. Hizongle pawl khenkhat te ngaidan envai-

Jehovah Witness te: Amaute thugin hoita agingtat chiengun Baptisma apia pan uh hi. Baptisma a pia loute uh. (i) Galkapte, (ii) Politics sai mite, (iii) Zu donte khamthei bol pouma leh (iv) Naungehte apia sih uh hi. Amau dan in Pastor upa orden chi um selou mizousie akibang uh hi.

UPC te: Jesu min bou in Baptisma apie uh hi, apie na jiehte uh ahile i) H/S pia chiemte na din ii) Khel ngaidam nadin. Iii) Krist thopna tan na din iv) Teptan tang in Baptisma a tang uhi. v) Tahsa dam na din a tang uhi vi) Tui a suohtatna/ hundamna din atang uhi.

Church of Christ te: Baptisma khu khel ngaidamna ding le hundamna dia tan teitei ding ahi chi’n a gingta uhi.

Salvation Army te: Baptisma anie shih uhi. Amaute ngaidan in mi ahing piengtha a galdouna thu chiam ah amin agiel thei chiangun puanlap nuai ah alut uhi, tua mi khu baptisma toh kibang in ageel uhi.A ngaidan un Tui khu sunglam a thahna chiamtena din a pom sih uhi.

Roman Catholic te: Amauten gingtat dan in Jesu I gingtat a, Mangpa Nita ann neh thei zousie hundam ahi ding uhi, chin agingta uhi. Tuoban a mi shi sate ading azong suohtat theina lampi aum hi, tuomi khu ahileh amaute dia Baptisma itanpia sale, ashi sate hagau a umna uh Purgatory (mi shi khuo/kitoldam namun) apat ahagau uh suota ding chin agingta uhi, pilvang vai. Hundamna pen silhoi bawl jieh a pieng thei hilou in Jesu Gintat na bou akitung thei giep ding hi chi thei vai.

Tambang gindan te pen evangelical gindan toh kibanglou ahi. Evangelical gindanin hundamna dia tan hilouin, hundamsa mite dia pualam chiemtena ahibou hi.

(ii)Mangpa Nita Ann (Lord Supper): Tami khu Mangpa Jesu thupia ahi “Kei na hing theizing na dingun bawlzing un” chin (1Kor.11:24-25) agen hi. Tami khu Symbolic ahibou hi. Tamna Tanghou leh Grape Tui pen in Mangpa Jesu eite ding a Atahsa leh sisan ahingki piading etsah ahi bou hi.

Tam tawh kisai a ngaidan dilou umte gen khawm vai;

Roman Catholic te: Pope in thumna ahingnei zou chiengin Tanghou leh Grape Tui pen Mangpa tahsa le sisan tahtah ahingsuoh tahi, chin agingta uhi. Khule a siempu ten un Tanghou leh Graspe Tui ane ua, nanleh mipiten Tanghou chou anegiep uhi.

Salvation Armyte: Mangpa Nita Ann pen Polam chiemtena ahilel jieh in anei sih uhi. nanleh Jesun ana bawlzing un chin thu ahingpie hi (Lk. 22: 14- 23, 1Kor. 11: 16-26). Bible tawh kikal hattuomte ahi uhi.

United Penticostal Church te: Amaute ngaidan in Jesu khu Tahsa leh Hagu sudamtu ahiman in, Tahsa damna dingin Tanghou aneh ua, Hagau lam hatna dingin Grape Tui khu adawn uhi. apiete uh ahileh Sie-le-pha thei a deitelna neitheite, hundamte bou in Ann kuong aim thei giep uhi.

Seven Day Adventist te: Tami abol ding chieng un a kisil sieng masa ngeingei ding uh ahi, chin akisil sieng masa uhi.

Jehovah Witness te: Thugousie dan in anei sih ua, nanlen Mangpa Nita Ann chin I MangpaJesu shini  Nisan 14 nin kum khat in khatvei ane giep uhi. 

Tami Mangpa Nita Ann pen Tahsa leh Hagau damna ding a neding jongahisia/bolding hilou in, khule kumkhat sung ahizat teitei bawl teitei dingzong hilou in, Mangpa I thei zing na ding ua bawl ding ahibou hi, khuleh Mangpa Nita Ann I nejie Vangam kai ding china zong hituon lou ahi. Tami khu Mangpa ahing thupia bang a, Ama I theizing na dingua ibawl zing ding uh ahi bou hi. Vangam kai nading hilou in, Gingtute zousie in ibawl chiet ding ua thupie ahizaw bou hi.

B.THEOLOGY

      1. Pasian tapate leh mihing tanute kiteng uh-Gen.6:2

Ans: Pasian tapate-Gen.4:26 (Seth hah-le-suonte kigenna ahia),

        Mihing tanute-Gen.4:16 (Kaina hah-le-suonte kigenna ahi).

       2. A bukimna ahingtung chieng in abukimloute subei hiding hi.1.Kor.13:10

Ans:  Bible

      3. Mihing dam kum 70/80 – Ps. 90:10

Ans. Dam kum 120 ahi ding hi Gen. 6:3(b)

      4. Pasian lim le meel isutna u bang adiei? Gen. 1:26

Ans. Pilna, Zalenna lungsim ineizie uh khu ikibatna u ahi.

Santa le santa lou maitam khu bang e? Gen. 4:3-5

Ans. Mite bolman a bollou a eima lungsim apat a piengkhia  Eg. Kain – Abel.

Na keng ua leivuite thingkhia un. Mk. 6:11.

Ans. a)Tamin lungthana a etsa hilou in, Pasian thu gingta loute hundam in aumsih ding u chi talatna ahi.

         b) Judate’n Gentelte gam atotkha chieng un akeng a potsan namun ua akeng ua leivuite a thingkhia uhi. Tamin mawpaina leh mahni kisiansuohna a gen ut ahi. (cf. Acts 13:51). Doctrine thu leh Theology thu pen Jn. 3:25 na in ikhupsit ding hi, tami thu ahile “Pientha na khu: Tui le Hagau” a pientha a poimaw pen leh ihinsan pen ahijieh in.

Pienthana ichi bang adiei?

“Adihtah iin ka hing hil ahi, mi koi zong apiengtha sileh Pasian gam amusih ding hi” chin Jesu’n Nicodem kung ah a gen hi. (Jn. 3:3).

I Mangpa Jesun Pasian gingtat nading ah a bulpipen/ thupipen achikhu PIENTHANA ahi. (Jn. 3:1-8) Mi koizong “ A pientha sileh vangam tunglou ding ahi”. Tuami zien pienthana thupi anuoi abang ahi.

Piengthana ichipen mikhat hinkhua a H/S vang a kikhel ahi.(Jn. 3:6, Tita 3:5) pienthana  (Rom 12:12, Eph. 4:23-24) ahi hi. Mi piengthate lungsung a Pasian iinkumton hinna a pie hi. (Jn.3:16,II Pet. 1:4, I Jn. 5:11). Pasian tanu, tapa ahing suoh sa hi. (Jn. 1:12, Rm. 8:16-17, Gal. 3:16), mitha hingsuohsa hi(II Kor. 5:17, Kol. 3:9-10). Leitung toh kipawl mi hinonlou ding ahi (Rm. 12:2), Pasian toh kibang abol tha ihita uhi (Eph. 4:24).

Mi zousie khiel ihi ua; koima Pasian thumang a um shi hi. Pasian lungdamsah theilou ihiman in, Jesu Krist a ipientha u a poimaw pen hi (Ps. 51:5, Jer. 17:9, Rm. 8:7-8, I Kor. 2:14, Eph. 2:3).

Mi khat akhelna pan kisia a Pasian kunglam azot a (Mt.3:2), Mangpa Jesu Krist hundampa a ginna toh asanchiengin mi piengtha aki chi ding hi (Jn.1:12).

Piengtha ichipen ihinkhuo luite apan kikhel, Jesu Krist deina bangah gamta hi (2Kor.5:17, Gal.5:15, Eph.3:23-24, Kol.3:10), a pingtha mi khu khelna suoh apan suohtah in (Jn.8:36 cf Rm.6:14-23), Pasian deidan leh H/S  mapui nataw gamtat na ahi (Rm.8:13-14), thumna tawh hinkhuo zang hi (1Jn.2:29), a kristian pite in in (1Jn.4:7), khelna pelsan/kiheisan in (1Jn.3:9, 5:18). Leitung silte ngai thupilou hi (1Jn.2:15-17).

A pientha mikhu khelna bol zongsang lou uhi (1Jn.3:9), khelna pel in, Pasian a lungkimsa hinkhuo leh lungkimsalou hinkhuo pen kizaw khawmthei lou ahi (1Jn.1:5-7), Pasian deina banga ahinkhuo zatpen Jesu Krist vang ahi(1Jn.2:3-11, 15-17, 24-29, 3:6-24, 4:7, 8:20, 5:1), Jesu Krist sunga detta a um naleh H/S mapuina tawh hinkhuo zang hi (Jn.15:4, Rm.8:2-14).

Mi khat in Pasian thu kagingta, ka piengtha chi a, ahinkhuo zatdan a Pasian lung deina bangah a

gamtat lou leh, Pasian ta hilou in Setan ta ahi bou hi (1Jn.3:6-10).

Mi khat piengtha kahi kichi’n, Pasian deidan ah agamtat luole Hagau a shi ahi (Rm.8:13), H/S thuomna/puina luole khelna in Pasian toh hing khen in Hagau lam shina hingtun hi (cf.Mt.12:31-32, 1Kor.6:9-10, Gal.19-21, Heb.6:4-6, 1Jn.5:16).

V.5 Mi koi zong apiengtha sihleh Pasian gam alut theisih ding hi chin Jesun Nikodem kungah agen hi.

Tui le hagau a pientha chi ngaidan tuamtuam en vai.

Tui le hagau khu sil kibanglou siltuam tuoh ahi a, tahsa le hagau zoong atuom tuoh ahi. Hinla Pasian in tuami ahing gom khom chiengin mihing ahing suo bangin, tui le hagau ami piengkhom chiengiin vanmi, tangton mi asuo hi, tuokhu Jesu’n agen ahia, zilsiem angai mahmah hi.

 Tui toh kisai ngaidan khenkhatte envai:

TUI chikhu akhenten THU agenna ahi. Achi uhi. Tui in silsiengloute asu siengthou bangin , lungsin sienglou thuhoi asopsieng hi , achi uhi. #Tui khu Thu hitle Bible in Thu le hagau iin achita ding hi.

Tui khu Baptisma ahi, chia giingta pawl a um hi, apansan ukhu Mk. 16:15 ahi. Baptisma tan khu hundamna hitle anuoi a “koi zong a gingtaloute siemmo tangin um ding” achi kia uhi.# Tui khu Baptisma hit le Bible akimu sihi. Amabou “ Ginna jie hundamhiding” chi ahi.(Eph. 2:8)Tuomi jie tui khu Baptisma a genna hilou ahi.

Tui a pienna achi khu, nu gilsung a naungeh a hing pien chiengin Tui ahing potkhia masa, tuomi khu tui a peiinna (pienthana) chi pawl a um hi.

Tui a Baptisma a genna ahi, chi pawl a um hi, ajeih pen John Baptisma khu “kisiana Baptismal eh khiel ngaidamna” ahijia, tami a gennna ahi , achi uhi.

Bible a hoita I et chiengiin John ini Tui a zat na zousie khu “Pasian thu” an genna ahideu pen hi. (IJn.5:6,8, Rev.7:17,21:6 sim in).

Tamna I genteng I et chiengin (5) na pen khu pomdia hoi pen ahi, ajiapen John peipi dan tangpi I et chiengin TUI khu “Pasian thu” ahi bangin peintha nading a “Pasian thu le Pasian Hagau” ma a poimo pen ahi.

V.8. “Hui a ut nalam lam ah alang ahi”.

Min hui amuthei si a, nanle ahiina azal kizou thei hi. Tuabang in pienthana pen thochi ding, khuchi ding, hichi ding chin kooiman agenthei si a, Pasian in asep hun hun chiengin a piengthei hi. Tuami zie’n na shih un na theilou zie in tuni in Mangpa khu  Mang le Hundampa’n kisan in, chi edei na jie tami paper ila ahi.

Akhupsitna:

Tunia tami iki kup nasan ahileh, Ginna lam a ipi chin theina ding ua mawlta iki kup uh ahizaw hi, Hattuom dangte hoilou chie kikum nuom kihi louin, midangte a, ei ataw akibatlouna itheisiem nading ua kahing la ahizaw hi. Vangan kai nading pen Hattuom thu hilou in Ginna jieh a Hundam ding aki hizaw bou hi. Bang hattuom a um nanlechin zong na pientha lou leh Vangam khu nang ading hilou ahi, mi piengtha te ading bou ahibou hi. Thei ding khat Doctrine theilou jieh I khristian hinkhuo peisuol thei hi. Ahinlah Doctrine jieh Hundam kihi tuon lou hi.