PASIAN GAM (Bible Study)

By Rev Dr M. Thangboi Zou                                                                                                                   

Thumapui: Tuni’n chinglou pumpum in Mathiu 6: 33 study bawl khawm vai chin ka hing kisah hi.

 

“Pasian gam leh adihtatna sui masa un…..”

Sildang teng sangin Pasian gam leh adihtatna sui dingin Mangpa Jesu’n ei a nuozuite hing hanthawn hi. “Sui” chipen “gamtatna pen lungsim zousie pia a, silkhat poupou sui ding ahilou leh chitatna toh silkhat munadia hanchiem” ding china ahi (cf. 13: 45).

 

1.      “Pasian gam” 33 (a):

Tamna Pasian vantung gam basileia kichi in leitung gam (geographical territory) heisung munkhat agenna hilou hi. Tamin agen nuompen ahileh “Pasian thuneina leh vaihawmna, Ama deidan a nna kisep namun” agenna hizaw hi. Pasian gam khu leitung kivaihawmna bang hilou in (Jn. 8: 36), Pasian vaihawmna, thukhenna leh a thuneina pen tam leitung abei chiengin hing tangtung pan ding hi (Kil. 19: 11-21). Tuami ziehin ei gingtuten (Khristian) i hinkhuo ua ikipawlkhawmna (fellowship) sung uah Pasian gam leh a thupina (power) ahing kilat khiet theina dingin chitatna toh isui ding uh apoimaw mama hi.

 

Pasian gam ichi chienga ithei dingte:-

 

1. Pasian gam (Kingdom of God):  Thuhun Lui laiin hichin ana kigen hi.

a) Day of the Lord: Tami Mangpa Ni means Pasian hingpei kiana dih ni ahia, Tualeh Pasian lungthana ni (day of Judgment) chin zong akigen tuo hi.

b) Day of the Lord: ichi kia chiengin Kum Sang leenggam (Melliniam) agenna ahia, tami ahi Israelte kinepna, agenna kizang hi.

 

2. Kingdom of Heaven: Tamin “Vangam” agenna ahi. Tami eite kinepna ahi hi. Pasian gam achieng zawsem a i thei semna dingun, tamna tamlou anuoi a point ka hing kaikhawmte apan enkhia vai ei:

i)                   Pasian gam in “Pasian thupina (greatness) atahtah ahina akipsah/ detsahna” agenna ahi hi. Pasian in ama mite lah a hing um in, Ama mite lungtang sunga hagau a kipawl kivaihawmna leitung ah hingpia ahi (Jn. 14: 23, 20:22). Leitung a thupina in hing kumsuh hi (Isai. 64: 1, Mk. 9:1, 1Kor. 4:20). Tami thupinapen leitung thu leh leitung silte toh kingaituo zoulou, hagau thu bou toh kitheichien theigiep hi. Pasian gam in leitung ngaina toh biehna sunga Pasian thuneina hilou in, tami leitung kumpigam tunga kipawlna toh kivaihawmna bang hilou hi (Jn. 18: 36). Pasian in gitlouna, kipawl khopna leh nasepna khat poupou tung tawnin leitung puophat ding leh tatkhiet ding sawm hilou hi (Mt. 26: 52, Jn. 18:36). Tuhun leitung umzia ma bangin Pasian mite leh agalte a umkhawm phot ding ma ahi hi (Jn. 15: 19, Rom 11:1-2, Jak. 4:4, 1Jn. 2: 14-17, 4:4 sim suo in). pasian vaihawmna a thukhenna leh a thupinate tam leitung abei chiengin hing tung ding hi (Kil. 19: 11-21).

 

ii)                 Bangziehin ichileh Pasian in Ama vaihawmna pen Ama mama in kipsah/ detsah a, tam leitung pen khelna sunga um hi. Pasian thupina akilatkhiet theina dingin dawimangpa gam sung teng patauna toh kidimsah a (Mt. 4:3, tuate pen 12: 29, Mk. 1: 29), mi zousie in Pasian vaihawmna sunga kipialut ding moh, dinglou chi a ngaisut na ding thu gel uhi (Mt. 3:1-3, 4:17, Mk. 1:14-15 sim in). Pasian gam sung luttheina dinga apoimaw pen ahileh, “Na khelna kisia unlen, Khantanhoi gingta un” (Mk. 1: 15) chi ahi.

 

iii)               Tam leitung thuneina izaw zou nadia Pasian thuneina ipoimawte ahileh:

a)      Setan vaihawmna leh a thuneina tunga hagaulam thuneina toh zawhna ahi (Mt. 12: 28, Jn. 18:36), Pasian gam hing tunna akipatna in Setan vaihawmna kisusietna ahi (Jn. 12: 31, 16:11), dawi-le-kau bawlsietna pan suotatna (Mk. 1: 34, 39, 3: 14-15, Nasp. 26: 18 sim in), khelna pan suotatna (Rom bung 6),

b)      Sillamdang bawltheina leh damloute damsah theina thuneina ahi (Mt. 4: 23, 9: 35, Nasp. 4:30, 8:7 sim in).

c)      Khantanhoi a kihilna ah khiel kiphawna, dihtatna thu leh thukhenna thute kihel ding hi (Mt. 11: 5, Jn. 16: 8-1, Nasp. 4:35 sim in),

d)      Khiel kisiana in khantanhoi agingta mite sunga hundamna leh sienthouna tun hi (Jn. 3:3, 17:17, Nasp. 2: 28-40, 2Kor. 6: 11-18 sim in), Khrist adia techipanna a thuneina aumna dingin Hagau Siengthou sunga tuiphumna (baptisma) chi Laisiengthou ginna thubulpite zui ding poimaw/ kisam hi (Nasp. 1:8, 2:4 sim in).

e)      Mi khatin Pasian gam a hinkhuo ah ahinpi theina dingin, “Hagau Siengthou vanga kitang/ kimu sienthouna, kilemna leh kipahna” thute anei ding poimaw hi (Rom 14: 17).

 

iv)               Pasian gam in tuhun leh mailam hunding (present & future) thu huomkhawm hi. Tuamin tuhun leitung ah aum thu ahi (Mk. 1: 15, Lk. 18:10-17, Kol. 1:13, Heb. 12: 28te simsuo in), ahi vangin Pasian vaihawmna leh ama thupinate aunsiengin kithei sieng/ jou nailou hi. Leitung bei dongin Setan leh migiloute nasepna leh thuneina umzing nalai ding hi (1Tim. 4:1, 2Tim. 3: 1-5, Kil. 19:19-20:10 sim in), ahing tungding a kilangkhia Pasian minthanna, a thupina leh ama gam pen leitung thukhen dingin Mangpa Jesu hingpei kia chiengin (Second Coming) hingtung ding hi (Mt. 24: 30, Lk. 21: 27, Kil. 19: 11-20, 20: 1-6 sim in). pasian gam tangtunna tahtah pen Mangpa Jesu Khrist in gitlouna leh langpanna zousie tungah guolzawna lain Pa Pasian in ama tungah kumpi gam apiekhiet ni chiengin hingtung ding hi (1Kor. 15: 24-28, Kil. 7:1-21:8, Mk. 1:15 sim in).

 

2. “Adihtatna” 33 (b):

Laisiengthou in “Dihtatna loungal in koiman Pasian gam amu/aluo thei sih ding” ana chi bangin, Pasian dihtatna ichipen Ama kumpi gam sunga um a sienthouna leh dihna akipan apiengkhia Pasian pienken khat ahi. Tualeh “Adihtatna” khu Hagau Siengthou tungtawnin eite in Khrist thupinate zui dinga, i suiding ahia, Khrist dihtatna neiin leitung toh kikhenkhia a mi zousie tunga Khrist itna i lakhiet ding ahi hi.

 

Phil. 2: 12-13 sungpan achienzaw sem nadin etbeh nalai vai: Na Hundamna (12, b): tamna “Hundamna” chi thu khu chi 2 in genthei ding ahi:

Khatna a: Hundamna khu Phil. 1: 19, 28 in agennuom pen ahileh, “dachienga hundamna bukim leh loupina tan ding thu” agenna ahi hi.

Nina a: Hundamna ichikia khu, “Ei gingtuten i damsung a hundam ihina sulangtu dinga Pasian leh mihing mitmu a, sienthouna leh kilawm tah a um dinga nna hoisep thanuom tah a hundam ihina sulang ding” china ahi.

 

Tualeh tamna “Na” chi thumal in agetnuom pen khu, “eima mimal chiet a ihutdamna thu uong genna kammal ahi. Hundam ihi nuo a mihing a kingahlou a, Pasian a iginna leh hepina khu Pasian mai a kingah ding ahidan a uong genna zong hikia hi.” Hundamna pen Pasian hepina vanga kitang ahia, ahivanga miten Ginna toh isan chiengin hing buching pan ahi, chi zong manghil sih vai. Gendan dang khat a genkia lei, “hepina zieha ginna a hundam mite ihi mabangin, inei hundamna pen atawp donga muolsuoh ding ipibawl ding ahi.” Tami thu toh kisai itheisiem sem na dingin point 4 zangin ihilchien kia nalai ding hi. Tuate ahileh:

i)                   Eiten itan hundamna pen mihing hakat vang hilouin, eite tunga hing kipia Pasian hepina leh Hagau Siengthou thupina toh itantou uh ahizaw hi.

ii)                 I hundamna apeisuo zing nadia eiten khelna dou ding, isung a um hagau siengthou deidan a ihin ding ahi.

iii)               I hundamna vantung dongin kichinsahna a “Pasian toh nasem khawm mi ihi ding ahi” (1Kor. 3:9).

iv)               I hundamna maban izoptousuo napen apoimaw mama thuginpi ahi a, “zau leh chitun pum a septou kiphamaw hi.”

 

3.      “Sui masa un” 33 (c):

Tamna “sui masa un”, chipen “Khatvei thua zoh thei ding hilou, bawlzawm zing ding”, agenna ahi hi. Gentelten asuite uh Pasian in abolding sate ahia, Khristiante pen Pasian ginna leh thuneina sunga kitulut a, adeidan dih leh siengthoute sui zawdinga hilin ium uhi. Tamna “Sui” kichi kammal in agetnuompen ahileh, “Semlou a mu/ngah chi agennopna hilou in, Pasian deidan sui a a thuzuina gen ahia, niteng hinkhuo, neh suina leh khosahna tenga Pasian deidan hinpina, agenna ahi main, Khristian hinkhuo dihtah” genna ahi hi.

 

Akhupsitna: Tamna ikaikhawm thute pansan in tukum i thupi amanphatdan leh athupina chiengdeu tading ka gingta hi. Ei gingtuten tam khovel i hin sunga i hinkhuo ua Pasian a khatnan koi theichiet talei, i innsung, i hattuom sung ah Pasian kipahna mite i hi ding ua, tuachiang in Pasian guolzawlna kiningching i dam sungin i tang thei tading uhi. Pasian guolzawlna, pilna, siemna leh innsung kining chingtah hin na nuom ei? Na nuom leh, na hinkhuo a Pasian khu akhatnan koi lehchin tuate hing hithei mai ding hi.

 

I khristian hinkhuo a Pasian gam leh adihtatna sui masa hattuom misiengthoute hithei chiet tadin, Mangpa’n tami ngaikhetu zousie Pasian thutah, thudih dinpi ngam ding leh dihlouna mun a Pasian min thanna ding ahi leh thutah, thudih shipi ngam din in zong hing guolzawl chiet tahen.